[Rubutun Hikaya] "IDONA" Labarin Bamai A. Dubawa

IDONA. "Labarin da yayi na Uku a Gasar ƙagaggun labarai ta Mujallar Zauren Marubuta". © Bamai A. Dabuwa Kkm 07037852514. "Kaka." "Iye." "An ce a zamaninku kuna shan su taba da wiwi amma da wayo..." "In ji wa?" tsohon ya katse shi a fusace. "E mana, ya ma sunan abun? Uuuumm! Yauwa lofe. Wai a shi kuke hadawa kuna zuka. Kai ma ka sha?" "A'a. Ni ban sha ba." "Me ya sa?" "Saboda idona." "Idonka kuma?" "E." "Ban gane ba, ta ina suka hadu?" "Saboda shaye-shaye na rage karfin gani da daddare." "Hmmm!" Shiru ne ya mamaye su na tsawon mintuna, kafin daga bisani yaron ya kuma nisawa da wata tambayar. "Kaka." "Miye?" "Me ya fi komai sauri a jikin mutum?" "Ido." "Ba zuciya ba?" "Ba zuciya ba!" "Hujja fa?" "Me ya sa idan abu ya faru da gaggawa muke cewa cikin kiftawar ido don kambama saurin?" "Eh kam. To menene a jikin mutum wanda ba ya girma tare da karuwar girman jikinsa?" "Ido." "Ido dai?" "Shi fa, domin shi ne tun haihuwarka na nan yadda suke sabanin su hanci da kunne." "Kaka." "Kai! Ka dame ni fa." "To a iska zan yi ta jelen kawo ma abinci kullum?" "Yaro ka daina, babanka ya kawo." "Kaka." "Ya aka yi?" "An ce ka kware sosai a soyayya da sace zuciyar mata lokacinka. Menene sirrin ka ban?" "Idona." "Shi ma?" "Eh. Kana so ka ji?" "Sosai ma." "Tsaya na ci abincin to." "Wato Kaka, zan so ka tsawaita rayuwa kamar shekaru dari." "Hmm! Na gode, ya aka yi ka san na ki jinin mutuwa?" "Ban sani ba." "To me ya sa ma min wannan fatan?" "So nake ka kai matsayin da hakoranka duk za su zube, na kawo maka cin-cin ka ci. Babana ya ba ni labarin yadda kakansa ke tauna goro ba hakori, na ci dariya." "Babanka ne ya ba ka labarin Babana?" "Eh." "Hmm! Idan kana so mace ta kware ma a soyayya, abu na farko shi ne kallo." "Kallo!? Ba za ta ce min maye ba?" "Ba kallo irin na kurilla ba. Ina nufin ka sa idonka a cikin nata. Ajinka nawa ma?" "Ina S. S 2." "Science ko Art?" "Science." "OK. Akwai sinadarin da yake sarka soyayya tsakanin mutum da mutum a gangar jiki. Sunansa Phenylethylamine yana samuwa a dalilin haduwar idanun juna." "Phen... Me!? Tab, ban taba ko ji ba." "Yau ka ji. Amma ka sani kamar yadda wannan sinadari ke haifar da shauki haka ne ma yake yi wa tsoro. Idan ba ka iya hannunka ba ka kalli wata zai iya zama kamar misalin haduwar idon Zaki da Akuya ne." "Ta yaya zan iya hannuna?" "Da idonka." "Ai kuma ka ce za su iya haifar da tsoro a tsakani ma." "Eh! Akwai kallon so ai." "Ya kallon so yake?" "Ka ga wannan digon bakin na cikin ido?" "Eh." "A duk lokacin da ka ga mutum ya kalli abu da dukkanninsu, ina nufin idan suka gwale yayin kallon abu to mutumin ya ga abun da yake so ne ko shauki." "Haka ne!?" "Haka ne. Wanda ya san hannunsa yana fara kallon abun da ya fi so ne a jikin wacce yake son kafin ya nemi su hada ido." "Na fahimta, amma ta ya zan gane ta afka?" "Ba ka da fahimta." "Da gaske ban gane ba Kaka." "To ka lura da yanayin digon bakin idanuwanta yayin da kuka hada idon." Sunkuyar da kansa kasa ya yi yana jinjina maganganun, kafin daga bisani ya dago a karaye da cewa: "Kaka ni matsoraci ne, ba zan iya hada ido da mace har na fahimci haka ba ko na sa mata sona ta kallo ido da ido!" "Akwai wata hanyar ai." "Yauwa! Wacce ce?" "Idonk." "Kuma dai?" "Eh. Bari ka ji." Dattijon ya ce da shi kafin daga bisani ya dora. "Ban sani ba ko ka taba lura da wani abu dangane da tasirin ido." "Me?" "Cewa idan da wani zai kura ma ido ta baya za ka ji a jikinka ko ka tsargu ana kallonka." "Eh kam, yana faruwa. "Yauwa. To yadda ake yi idan kana jin tsoro ko kunyar hada ido da ita shi ne satar kallonta." "Satar kallo?" "Eh. Ina nufin a duk lokacin da hankalinta ba ya wajenka to ka kura mata ido kawai." "Idan ta tsargu ta juyo fa?" "Za ta juyo kam." "Ai ka ji. Ni da nake da tsoro ya zan yi idan ta juyo?" "Ka dauke kanka daga gareta da sauri." "Kwafsi kenan. Ina hikimar hakan?" "Hmm! Hanyoyin shigar soyayyar matsorata da masu kunya guda uku ne." "Ina jinka." "Na farko shi ne satar kallon wacce ake so, gaza dauke ido yayin da aka hangota daga nesa. Sai kuma kauda kai yayin da ta kama ana kallonta. Idan wadannan abubuwan suka faru tsakaninku, to so ya gitta kenan. Kuma hakan zai haifar mata da waccan sinadarin kwatankwacin na saka idonka a nata. Sai dai..." "Sai dai me kuma?" "Idan ka hadu da wacce ta san hannunta ko ta kware a yaudara to ta yi ta rufta ka kenan alhalin ba son naka take ba. Ina nufin wacce ta san sirrikan ido." "Akwai matsala kenan." "Idan da gara ta hadu ba!" "Ana gane su ne to?" "Sosai ma." "Ta yaya?" "Da ido." "Komai wai da ido ake yi ne?" "Yaro za ka iya binne damuwarka ta hanyar murmushi, amma duk wayonka sai ido sun fallasa." "Ina jinka to." "Kasan me?" "A'a. Me?" "Zan fada maka wasu sirrikan ido da kallo a cukurkude kila, ya rage naka ka fahimta." "To Kaka, ina sauraro." "A komai idan kana son gano gaskiya ko karyar mutane to ka fara sa su a daidain yanayinsu." "Ban gane wannan ba aradu." "Ina nufin ka fara sawa su ji sakayau nutsuwa da sakin jiki." "Na gane, amma ta yaya zan sa su ji hakan?" "Misali: Idan kana son fahimtar gaskiyar matarka ko budurwa musamman wacce kake zargin ta san hannunta a karya. Ka fara dauko wata hirar ku tattauna kalar hirar da babu wani dalili na karya ko 6oye wani abu akai. Kamar akan yanayi ko wani film da kuka kalla. Da zarar ta saki jiki ta fara magana a lokacin ka zubawa yanayinta ido, kuma ka haddace su. Domin za ta kuskurewa yanayin ranar da ka tuhumeta akan abun da take ma karyar duk wayo da sanin hannunta." "Hmmmmm!" "Daga karshe, tsaya ka ji wannan." "To. " "Makaryata sun fi masu gaskiya yawan hada ido da mutum. Amma masu gaskiyar sun fi jurar haduwar idon yayin da aka fuskance su." Shiru yaron ya yi yana kallonsa, wannan ya ba shi damar ci gaba. "Idan kana magana da mutum ko ka ga ya daga kai yana kallon sama, hoton abun da kake fada yake wassafawa. Ko wani abu yake son tunowa idan shi ne mai maganar." "Haka ne?" "Eh. Idan kuma kana magana da mutum ko da zarar kun hada ido ya dukar da kansa wannan yana girmama ka ne ko ya aikata laifin da ake tuhumarsa." "Na san wannan." "Idan mace ta kalle ka sannan ta daga kanta sama kuma ta kalli wani waje tana nufin "mu je can"." "Idan ka hangi mutum kansa a duke sannan ya kalli bangaren hagu to magana yake da kansa." "Da gaske?" "Da gaske. Idan kuma ka ga kwayar idon mutum na juyawa gefe da gefe, ba shi da gaskiya ko ta carke." "Hhhh! Tsuru-tsuru kenan." "Idan mutum ya dauke idonsa daga gareka da daga kai sama yana kallon hancinsa, yana nufin ya wuce da ajinka." A daidai nan ya yi shiru yana numfasawa kadan- kadan. "Kaka." "Kai! Tashi ka tafi mai surutun tsiya." Karshe.